നടൻ സിദ്ധാന്ത് വീർ സൂര്യവംശി ജിംനേഷ്യത്തിൽ കുഴഞ്ഞുവീണു മരിച്ചു

മുംബൈ: നടൻ സിദ്ധാന്ത് വീർ സൂര്യവംശി (46) ജിംനേഷ്യത്തിൽ കുഴഞ്ഞുവീണു മരിച്ചു. മുംബൈയിലെ ജിംനേഷ്യത്തിൽ വ്യായാമത്തിനിടെയാണ് നടൻ ദേഹാസ്വാസ്ഥ്യം അനുഭവപ്പെട്ടത്. തുടർന്ന് കുഴഞ്ഞു വീഴുകയായിരുന്നു. ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാനായില്ല. ഹൃദയാഘാതമാണ് മരണകാരണമെന്ന് സ്ഥിരീകരിക്കാത്ത റിപ്പോർട്ടുകളുണ്ട്.

മോഡലിങ്ങിലൂടെയായിരുന്നു സിദ്ധാന്ത് വിനോദരംഗത്ത് എത്തുന്നത്. ഏക്ത കപൂർ നിർമിച്ച ഖുസും എന്ന സീരിയലിലൂടെയാണ് ടെലിവിഷൻ രംഗത്ത് അരങ്ങേറ്റം കുറിച്ചത്. സമീൻ സേ ആസ്മാൻ തക്, വിരുദ്ധ്, ഭാഗ്യവിധാത, മംമ്ത, ഖയാമത്ത് തുടങ്ങിയ സിരീയലുകളിൽ വേഷമിട്ടു. 2007-ൽ ഇന്ത്യൻ ടെലി പുരസ്കാരം നേടിയിട്ടുണ്ട്.

മോഡലായ അലേഷ്യ റാവത്ത് ആണ് ഭാര്യ. രണ്ടു മക്കളുണ്ട്.